🔸Куһаҕан түүлү түһээтэххэ ааны тэлэйэ аһа баттаан «киирбиккэ, тахсыбыкка биэр» — дииллэрэ.
Аны үчүгэй түүлү мээнэ кэпсээн оҥостубаттара, бэйэлэригэр иҥэринэллэрэ
Сорохтор үчүгэй түүллэрин кэпсэл оҥостон, киһиргээн дуу,
күүһүн өһүлэн кэбиһэллэр.
🔸Урут сууналларыгар айаҕынан омурдан, аһыыр миискэҕэ суунан түктэри быһыыланаллара.
Сиргэ ууну бырдаҥалаппакка,
уот иннигэр суунар, тараанар сатамматын билиэххэ.
Суунар киһиэхэ ууну илии таһынан куппаттар, өлбүт киһини бэйэттэн араараары итинник кутан сууйаллар.
🔸Аһы астыырга, уһаныыга, иискэ, булка куһаҕаны ахтыллыбат,
тыл-өс үтүөтүн саҥарыллан, ол аата оҥорор оҥоһуктарбытыгар, булка-аска тылынан тупсаран,
Айыы тыынын иҥэрии буолар.
🔸Иһэр уугутугар, Эбэҕэ да буоллун күлүккүтүн көрүнүмэҥ.
🔸Аһа суох иһити кэһээбэттэр.
🔸Саха киһитэ хаама, сүүрэ сылдьан аһаабат,
остуолга олорор, оҕолоргутун онно эмиэ үөрэтиҥ.
🔶Сиргэ-уокка, дьиэҕэ уот иччитигэр
Айыы аһынан күндүлүүргэ аһы талымастаамаҥ,
сиримэҥ, туох баарынан айах тутуллар.
🔸Аһыыр остуол сирэйин охсуллубат,
уйгу-быйаҥ сүрэ көтөр, иһити-хомуоһу быраҕыллыбат, солуута суох тыаһатыллыбат,
ас-үөл иччитэ өһүргэниэн сөп.
🔸Үлэ илии иһинэн оҥоһуллуохтаах,
таһынан тутуннахха барытын антах анньыаххын сөп.
🔶Өбүгэлэрбит баска кэтэр бэргэһэлэрбитин хаһан да умса уурбаттара,
суолтата «умса түс» диэн.
🔸Бэргэһэҕэ киһи кута-сүрэ иҥэр,
атын киһиэхэ бэриллибэт, уларсыкка барбат.
🔸Атах таҥаһын тумсунан аллараа хайыһыннаран ууруллар,
арай өлбүт киһи атаҕын өрө тэбэн сытар дииллэр.
🔸Түннүгү кичэйэн ыраастыы сылдьар куолу, сырдык дьиэҕэ киирэн кири-дьайы ыраастыыр.
🔸Дьиэ иһигэр иһиириллибэт, дьиэ итии салгыннаах буолуохтаах.
🔸Дьонун харыстыан, араҥаччылыан баҕарар Эр киһи тыаттан этиҥ түспүт маһын хомуйан киллэрэн, дьиэтин аанын үрдүнэн анньар уонна сотору сотору уматан бэйэтин, дьиэ-кэргэнин,
эбэтэр дьиэ иһин, тэлгэһэтин ыраастыыр.
🔸Киһи өлбүтүн кэннэ 40 күн көспөттөр, дьиэ абааһыланар дииллэр.
Барар түбэлтэҕэ дьиэҕэ саамай туттуллар ханнык эмэ малы 40 күҥҥэ диэри хаалларыахха наада.
🔸Көспүт дьиэттэн сиппиири, хотонтон саах күрдьэр күрдьэҕи илдьибэттэр, дьиэ,
хотон иччилэрэ иҥпит маллара.
🔴Бу үөһээ ыйыллыбыт сүбэлэри тутуһан олордоххо,
дьиэни-уоту үчүгэйдик туттахха, дьиэ иччитэ киһиэхэ аламаҕай буолар диэн
Өбүгэлэрбит итэҕэйэллэрэ.
Кырдьык киһи бэйэтин тулалыыр эйгэтигэр харыстабыллаахтык ытыктабыллаахтык сыһыаннастахпытына —
УЙГУЛААХ ОЛОХПУТ САЛҔАНАРЫГАР ОЛУК БУОЛАР.