Хайдах көрсөбүт?
От күөх мас моҕойун сыла бүтэрэ номнуо биир ый хаалла.
Онтон кэлэр 2026 сыл, илиҥҥи халандаарынан
уот кыһыл ат сыла буолар. Алаһа дьиэбитигэр дьол-соргу, уйгу-быйаҥ тосхойорун туһугар кэлэр сылы хайдах көрсөбүт?
Тугу кэтэбит?
Остуолбутун хайдах тардабыт?
Уот кыһыл ат кытай гороскуобугар сэттис кыыл буолар — кини көҥүлү, эрчими, инники күөҥҥэ буолары ордорор.
Онон кэлэр сыл уларыйыылары түргэнник ылынар эрчимнээх дьоҥҥо дьолу тосхойуо.
Кэлэр сылтан тугу күүтэбит?
Карьераны уларытыы, дуоһунас үрдээһинэ ордук табыллыахтара.
Тэрилтэ салайааччылара, урбаанньыттар тэрилтэлэрин кэҥэтэр туһунан толкуйданыахтара. Ол эрээри олус ыксаабакка, анааран көрөн быһаарыыны ылынар ордук. Үп-харчы сэрэҕи сөбүлүүр. Ордук түөкүттэр угаайыларыгар, араас «пирамидаларга» киирэн биэрэр куттал баар. Ат бэйэтэ олус үлэһит кыыл буоларынан — төһөннөн элбэхтик үлэлиигит да оччоннон баайгыт-дуолгут хаҥыа. Дьиэ кэргэҥҥитигэр иллээх-эйэлээх олох күүтэр. Сүрүнэ кэргэҥҥитин кытары истиҥник кэпсэтиэххитин, болҕомто ууруоххутун наада. Эти-хааны бөҕөргөтөргө успуорудунан дьарыктаныҥ, режими тутуһуҥ, сөпкө аһааҥ диэн сулустар сүбэлииллэр
Саҥа дьылы хайдах көрсөбүт
Өрө көрөн турар ат фигураларынан киэргэттэххэ ситиһии эҥээрдэһиэ. Дьиэ ис барааныгар уонна дьуолка киэргэлигэр биллэн турар кытархай, кыһыл көмүс, фиолетовай дьүһүннэри дьүөрэлиир ордук. Саҥа сылы көрсөргө чүмэчи уматыахха сөп, эрээри уоттан-күөстэн сэрэхтээх буолар умнуллубат, ол иһин батареянан барар чүмэчи араас уота бастыҥ киэргэл буолуо. Чугас дьоҥҥутугар мээнэ малы-салы буолбакка тыйаатырга, айаҥҥа билиэт, фитнес абонемена уо.д.а. бэлэх оҥорор ордук. Тоҕо диэтэр ат биир сиргэ олорбот — көҥүлү сөбүлүүр кыыл. 2026 сыл үгүс элбэх бэлиэ түгэннэри кэрэһэлиир. Саҥа дьылы көрсө ол-бу наадата суох бөхтөн-сахтан дьиэни ыраастыыр оруннаах. Алаһа дьиэҕитин кылбаччы сууйан-сотон, саҥа штора иилэн, бэл ыскаадаргытын уларыттаххытына кэлэр сылга ситиһии сиэттиһиэ. Ол да курдук, эһиэхэ иннинэн буолбат дьону кытары сибээһи быһар ордук. Саамай сүрүнэ — саҥа дьылы үчүгэй настырыанньалаах көрсүллүөхтээх — этэргэ диэри кини бүттүүн кэлэр сылы быһаарар буолар. Саҥа дьыллааҕы остуолга убаһа этиттэн аккаастаныҥ. Ол оннугар элбэх оҕуруот астаах (бэйэ киэнэ биһирэнэр), фрукталаах уонна балык эттээх остуол кэлэр сылга уйгуну-быйаҥы аҕалыа
Тугу кэтэбитий?
Үөһээ этиллибитин курдук, уот кыһыл ат сылын кытархай дьүһүннээх таҥастаах көрсөр оруннаах — кытархай, сырдык саарыл, терракот, кыһыл көмүс, оруосабай. Онтон аһары чаҕылхай өҥү кэппэт дьон хоҥор, изумруд от күөҕэ уонна бу эргин дьүһүннээх таҥаһы кэтиэххитин сөп. Кыһыл, кыһыл-көмүс араас килэбэчигэс таастаах киэргэл уобараһы ситэрэн биэриэ. Халлаан күөх, сиэрэй өҥнөрү тумнар ордук, тоҕо диэтэр уот кыһыл ат энергията «умуллан» хаалыан сөп.
Сүрүнэ барыта бэйэтэ табыллыа диэн баран олорор нэс дьону бу сыл хаһаайката — уот кыһыл ат сөбүлээбэт, ол иһин бэйэҕит эмиэ сыал-сорук туруоран эрэллээхтик хардыылыыргыт ирдэнэр. Саҥа сыл кэлэрэ биир ый хаалла — бу кылгас кэм иһигэр санааны сааһыланан, ситэриэхтээҕи ситэрэн кэлэр 2026 сылы үөрэ-көтө көрсөргүтүгэр баҕарабыт!