Хас өрөбүл күн, күн оройугар КУҤҤЭ аналлаах сиэр-туом оҥоһуллуохтаах. Биһиги күн оҕолорунабыт, күҥҥэ алгыс тыллар ананыахтаахтар. Оччоҕо күн энергията, эттиктэрэ түһэннэр киһиэхэ, айылҕаҕа иҥэннэр тус олоххор табыллыы кэлэр, сэниэлэнэҕин, үлэҥ хамнаһын күөстүү оргуйар буолар. Маннык сиэргэ туомна санаата түспүт, депрессиялаабыт дьон булгуччу сылдьыахтарын наада.
Ыйга биирдэ, ый туолбут киэьээтигэр ыйга сүгүрүйүү сиэрэ-туома оҥоһуллуохтаах. Ый киһи ис эйгэтин уонна чараас эйгэни кытта сибээстээх. Бу күҥҥэ оҥоһуллар сиэр туом инники олоххор улахан уларыйыылары аҕалыан сөп, ол эбэтэр чараас эйгэ арыллан, сиэргэ туомна этиллибит тыллар сиэмэ курдук киирэннэр иитиллэн, оҥоһуллан бараллар уонна тоҕоостоох кэмҥэ кэлэн түһэллэр. Бу сиэр туом кэнниттэн киһи ис эйгэтэ уһуктар, интуицията улаатар, дьоҕурдара арыллаллар үо. д а. Киһи сылайбыт курдук буолуон сөп, ол иһин күүскэ утуйуохтаах, ый күүһүн иҥэриниэхтээх.Онон ыһыахха эрэ буолбакка, хас өрөбүл аайы, хас биир улууска, хас биир бөһүөлэккэ, дьиэ кэргэҥҥэ күҥҥэ сүгүрүйүү сиэрэ-туома ыытыллара буоллар, дьэ кырдьык сырдык элбээн, айылҕабыт, ийэ сирбми тыын ылан уйгу-быйаҥ, дьоллоох олох кэлиэ этэ.
Алгыс диэн «Аал тылы ыс» диэн буолар. Аал диэн куйаарга аан маҥнай олох баар буолуоҕуттан кэлбит тыл, ол эбэтэр судургу өйдөбүлэ «Ытык ньэнир», «Таҥара энергията» диэн. Киһи бу орто дойдуга аналлаах кэлэр ол эбэр Аалга холбонуохтаах. Дьэ оччоҕо олоҕун табыллан, сирдээҕи кэлбит сыалгын-соруккун өйдөөн, ситиһэн, дьоллоох олоҕу олороҕун.
Ол Аалга холбонорун ис эйгэҕин кытта ситимнээх. Киһи иһигэр эйгэ баар. Судургутук быһаардахха, портал курдук баар. Ол нөҥүө эн өбүгэлэргин, айылҕаны кытта ситимнээххин, ол нөҥүө эн аналгын тобулаҕын. Дьэ ол эйгэбит уһуктарыгар, сааһыланарыгар, чинииригэр, кэҥээн-тэнийэн барарыгар бары үлэлэһэбит. Төһөнөн ис эйгэҥ кэҥиир да, таһымын тахсан иһэр. Төһөнөн таһымын тахсар да соччонон элбэҕи өйдүүр, анаарар буолаҕын уонна Айыылар таһымнарыгар тардыьаҕын, Таҥара өйүгэр санаатыгар чугаһыыгын. Төһөнөн тардыьаҕын, чугаһыыгын да соччонон көҥүл буолан иһэҕин. Дьэ, итини барытын оҥорор сахаҕа биир ньыма баар, ол эбэтэр — АЛГЫС — ААЛ ТЫЛЫ ЫС!
Бу ААЛ диэн тыл итэҕэл төрдө, силиһэ мутуга буолар. Хас биир саха киһитэ билиэхтээх
Кэнники бириэмэҕэ Аал Луук Маһы уларытан Ала луук мас дииллэр эмиэ бааллар. Оннук буолбатах. Сымыыт курдук быһыылаах куйаарга, энергия 8 быьыылаахтык үөһээ аллараа эргийэ турар. Ону эргитэр ААЛ Луук Мас буолар.
Ол эбэтэр ытык нэньири эргитэр, үс дойдуну ситимниир ААЛ ЛУУК МАС дэнэр
Саҥа билии: тоҕо «көмүһү» көмүс диэбиттэрэ буолуой? Тоҕо былыр былыргаттан дьон-сэргэ көмүһү сыаналыырый, көмүскэ тардыһарый? Тоҕо эр киһи кыаҕырда да дьахтары көмүскэ суулуу сатыырый?
Көмүс диэнтэн «көмүскээ», «көмүскэс» диэн тыллар тахсыбыттар. Ол эбэтэр көмүс диэн тыл дириҥ суолтата күнтэн кэлбит харысхал диэн.
Бу сиргэ сир баайа көмүс, хорҕолдьун уонна да атын металлар, таастар хайдах үөскүүллэрий?
Куйаарга күннэр өрүүтүн эттиктэрин сибэкки пыльцаны ыһарын курдук тарҕата тураллар. Ийэ сир яйцеклетка курдук буолар, киниэхэ ол пыльцалар иҥэллэр оччоҕо сир баайа үөскүүр, оплодотворение буолар. Ол эттиктэр кэллэхтэринэ дьүкээбил тахсар, дьэ оччоҕо сир саҥаттан саҥаны төрөтөн таһаара турар. Билигинни кэмҥэ күн активнаһа үрдээтэ, дьүкээбиллэр сотору сотору тахсар буоллулар. Ол быһаарыытынан буолар, ийэ сир саҥа кэмҥэ бэлэмнэнэрэ. Биһиги кэннибититтэн киһи аймах төрөөн ууһаан тэнийэн олоруоҕа, кинилэр эмиэ аһыахтарын-танныахтарын наада, ону өйдөөн биһиги сиэрдээх буолан сирбит баайын харыстыы, кэлэр кэнэҕэски ыччакка хаалларыахтаахпыт. Ийэ сир олоҥхоҕо кэпсэнэрин курдук «охтон бүтэр мастаах, уолан бүтэр уулаах», ол эбэтэр туох да муҥура суох диэн суох. Биһи аһары баран сирбитин дьөлө ууттээтэхпитинэ, кэлэр ыччакка туох да хаалыа суоҕа.
Тоҕо «күн киһитэ көмүскэс, айыы киһитэ аһыныгас» дииллэрий? Дьэ бу түҥ былыргыттан, саха муспут олоххо көрүүтэ, философията. «Күн киһитэ көмүскэс» буолан, ону туоһулаан кыһыл көмүһү сыаналыыллар эбит, ол эбэтэр кыһыл көмүс диэн күнтэн кэлбит метал, күн эттигэ материальнай эттиккэ кубулуйуута. Ол иһин былыр аан дойду араас муннуктарыгар улахан храмнары тутаннар барытын көмүһүнэн буруйэллэр эбит, күҥҥэ сүгүрүйэллэр, күнтэн көмө, харысхал көрдүүллэр. Ыраахтааҕылар көмүс корона кэтэллэр, малы салы тутталлар.
Саха үрүҥ көмүһү өрө тутара, көмүс сыаналааҕын иһин буолуо. Олоҥхоҕо көмүһү көмүс дииллэр дии, үрүҥ хара диэн араарбаттар. Кыһыл Көмүс наһаа улахан энергетическай суолталааҕын, сыыһа тутуннахха иирсээн, өлүү сутуу тахсарын билэр эбит буолан, үрүҥ көмүһү тутталлара буолуо. Үрүҥ көмүс, платина уонна да атын манан, тымныы металлар, ыйы кытта сибээстээхтэр. Оннук кэриҥэ алтаны туттар буолбуттара буолуо. Алтан «аалы таҥар» диэн суолталаах. Хас да метал холбоһон, кыьыл көмүскэ маарынныыр дьүһүннэнэр. Сүрэххин, көхсүн хараҕын бүөлүүр куьэнэлэр барыта алтантан дии, ол эбэтэр бу сүрүн чакралары, күн энергията киирэр сирин күүһүрдэн уонна көмүскээн аранас металынан буелууллэр.
Көмүс наһаа сыаналаах буолан чуорааннары алтантан оҥороллор. Бу чуораан тоҕо баар буолбутуй? Чуораан ис суолтата тыас таһаарар эрэ буолбатах, кини ис суолтата чараас эйгэни хайытар! Былыр олох кыахтаах ойууттар, удагаттар чуорааннара кыһыл көмүстэн эбитэ буолуо. Кэнники сиэр сутэн, өлөрүү, халааһын турбутуттан чэпчэки сыаналаах металга көспүттэрэ буолуо. Онон ебугэттэн, чараас эйгэттэн, сир дойду иччилэриттэн көмө көрдүүр буоллахтарына, былыр былыргаттан чуораан тыаһаталлар. Ойууттар удагаттар уратылара диэн, кинилэр чараас эйгэни хайытан, көстүбэт күүстэри айылҕа биэрбит күүһүгэр тирэҕирэн, илэ таһааран кердеруехтэрин-иьитиннэриэхтэрин сөп, биитэр алҕаан сиэмэ курдук алгыс тыллары онно уган биьиэхтэрин сөп. Ол барыта «көмүс», «көмүс дуйдаах» чуорааннар нөҥүө оҥоһуллар.
Онон көмүһү күннэр, ыйдар, куйаар иһигэр сырдыгы таһаарар эттиктэр көмүскэллэрэ диэн өйдүөххэ, харыстыахха, кэлэр кэнэҕэски ыччакка хаалларыахха.
ТуһаанньытЫТЫК ИЭС (энергетическэй иэс –энергодолг перед Создателем))
Бу орто дойдуга өбүгэлэрбит хардыы аайы иччилэртэн ааттаһа-көрдөһө, көҥүллэтэ, алгыстыы сылдьаллара. Оннооҕор маһы кэрдэллэригэр көҥүллэтэн баран биирдэ кэрдэллэрэ. Өбүгэ этэринэн, уу, салгын, сир-дойду, от-мас барыта иччилээх. Салгын иччилэрэ күнү быһа салгыны ыраастыыллар (ауратын), уу иччилэрэ ууну, сир иччилэрэ сири. Орто дойдуга босхо диэн суох. Оннооҕор тыынар салгыммытын, иһэр уубутун, хаамар сирбитин күн аайы алгыһынан, махталынан, сиэринэн-туомунан төлүөхтээхпит. Билиҥҥи дьон орто дойдуну босхо курдук саныылларыттан, иччилэри итэҕэйбэттэриттэн ыалдьаллар, арыгы иһэллэр, олохторо табыллыбат. Сүрүн төрүөт айылҕаны босхо туһаммыттарыгар сытар. Холобур, уоппутун, итиибитин, газпытын төлүүбүт, төлөөбөтөххө ыстарааптыыллар, суут приставтара кэлэн телевизоргын, массыынаҕын илдьэ барыахтара. Дьон сокуона оннук, үлэ булгуччу төлөнүөхтээх. Айылҕа сокуонунан эмиэ, иччи ыраастаабыт үлэтэ төлөнүөхтээх. Төлөөбөтөххө, киһиэхэ айылҕа ыарыыны, кыһалҕаны, куһаҕан дьаллыгы, оҕолор табыллыбаттарын, эдэр ыал арахсыытын ыытар. Дьон табыллыбата, дьэ, дьиҥэ итиннэ сытар.
Япония цунами, Фукусимо кэнниттэн охто сытар, экономиката отут бырыһыан түстэ. Европа дириҥ кризискэ киирдэ. Аан дойду финансовай кризискэ ыбылы ылларда. Ураган, торнадо, сайын хаар, кыһын ардах кэлэр. Айылҕа иэстээҕи ити курдук накаастыыр. Испанияҕа ырыаҕа ылламмыт Гренада диэн сир баар, онно биэс сыллааҕыта улахан ураган ааспыта, оту-маһы, плантациялары барытын алдьаппыта. Ол иһин бу сиртэн дьон көһөн хаалбыт. Чөлүгэр түһэрэргэ үп-харчы көстүбэтэх үһү. Оннооҕор этэҥҥэ олорор сирдэргэ кризис буолан, онно үлэ суох. Ити курдук европейскэй цивилизация үтэһэтэ туолан, эстэн эрэр. Кинилэр айылҕаны босхо баай курдук көрөллөр, иччилэри билиммэттэр, язычниктары утараллар. Айылҕаҕа сүгүрүйүүнү кытаанахтык бопсоллор. Ол түмүгэ, дьэ, илэ көстөн эрэр.
Кыһалҕалаах киһи оронун тыытаайы ыллыгыттан көһөрөн, салгыны, ууну, сири күн аайы махталынан төлүүргэ үөрэттэххэ, кини олоҕо харахтан сыыһы ылбыт курдук тупсан барар. Махталга, алгыска киһи чакрата үлэлиир. Кини тыгар эниэргийэтэ – Айыылар, иччилэр баар-суох соҕотох аһылыктара. Чакра эниэргийэтин хаантан ылар уонна үрдэтэн тыгар (трансформатор курдук). Чакра – хаан эниэргийэтин үрдэтэр аналлаах трансформатор. Киһи сэттэ улахан чакралаах, ол чакралар алгыс, үөрүү-көтүү, астыныы, дуоһуйуу кэмигэр үлэлиир. Онтон саамай элбэх эниэргийэни оҕолор оҥороллор.
Төрдүс чакра – сүрэх чакрата диэн ааттанар. Таптыы көрдөххө, астыннахха, дуоһуйдахха үлэлиир. Бэһис чакра – күөмэй чакрата. Сахалыы тойукка, дьээ-буоҕа, кылыһахха, киҥинэйэн ыллаатахха, хомуска үлэлиир. Алтыс чакра (үһүс харах). Мас уотун, кыһыл чоҕу көрдөххө үлэлиир. Сэттис чакра – орой чакрата алгыска үлэлиир. Саха былыр бэһис, алтыс чакратын күүскэ үлэлэтэрэ. Махталга сэттис чакра үлэлиир. Ол курдук, өбүгэ чакрата куруук үлэлиирэ: кини от-мас тиэйэн иһэн, оҕуска олорон эрэ күҥҥэ 4-5 чаас устата киҥинэйэн ыллыыра (бэһис чакра), уоту уонча чаас көрөрө (алтыс чакра). Өбүгэ куруук айылҕаҕа махтанара.
Чакра эрэ буолбакка, хас биирдии уорган бэйэтэ туспа эниэргийэни таһаарар. Ханнык чакра чугас да оннук эниэргийэни уорган эмиэ тыгар. Уорган, дьэ, хаһан үчүгэй эниэргийэни тыгарый, иччилэри аһатарый? Киһи холкутуйдаҕына. Холку киһи уорганнара сөпкө үлэлииллэр, иччилэри аһаталлар, эниэргийэ оҥороллор. Кыыһырар, кыйыттар киһи быара аанньа үлэлээбэт, быар иэһэ элбиир (желчный человек). Оччоҕо бу киһи хойут быара аккаастыыр, искэн буолар. Долгуйар киһи бүөрүгэр оҕустарар. Бүөрэ аанньа үлэлэлээбэт. Бу киһи хойут бүөрэ аккаастыыр (иэһэ улаатар). Хомойор киһи очоҕоһо хам тутар. Хойут суон очоҕоһо искэн буолуон сөп. Өһүргэс киһи бронхиттаах, онтон астма буолуон сөп. Ханнык уоргана айылҕаҕа улахан иэскэ киирэр, онто эрдэ аккаастыыр. Киһи айылҕаҕа иэһэ уорганнарыттан эмиэ барар. Бу иэһи (эниэргийэни) Айыылар киһи төрүүрүгэр дьылҕатыгар суруйаллар. Киһини кинилэр аһаары айбыттара оонньоон, эксперименнээн буолбатах.
Сир — чакра эниэргийэтин…