⁃ Оҕоҕор хаһан да күүскүнэн өттөйүмэ. Күүскүнэн араас боппуруоһу быһаарсар буоллаххына, оҕо санаатыгар » Ким күүстээх ол кыахтаах» диэн өйдөбүл олоҕуруон сөп.
⁃ Кини көрдөспүт баҕа санаатын толорбокко сылдьан эрэннэримэ, албыннаабыт диэн санааттан оҕо эрэммэт буолар.
⁃ Кыайарын-хоторун оҥорон биэримэ, аныгыскы сырыыга сэлээннэнэн кэбиһиэн сөп.
⁃ Дьон истэригэр » сыыһа гыннын» диэмэ, ис туруга эйигин утары барарыгар көҥүл биэрэҕин. Ким да суоҕар утары көрсөн олорон сэһэргэһэр ордук.
⁃ Улааттаҕын аайы тас эйгэтин билээри, айан-оҥорон кэпсиирин утарыласпакка ылынар ордук, ол аата тас эйгэтин кытары билсэр. Сэрэнэн көннөрөн биэриэххэ сөп.
⁃ Бэйэтин иннин көрүнэн, дьаһанан сылдьарыгар кыах биэрдэххэ, төрөппүт оҕотугар эрэнэрэ улаатар, оҕо бэйэтин күүһүгэр эрэлэ улаатар.
⁃ Сыыһаларын бэйэтэ көннөрө үөрэнэрэ ордук. Кини оннугар эппиэтинэһи ылар, үрдүттэн көмүскэһэр сыыһа. Кэлин онно үөрэнэн, бэйэтин көмүскэнэр күүһүн толору туһаммат.
⁃ Саҥаны билбитин сэргиир, хайыыр ордук.
⁃ Кыра киһини хайдах баарынан таптыахха, ылыныахха, атын оҕолору кытта тэҥниир сатаммат. Кини киһи быһыытынан кимҥэ да майгыннаабат уратытын чорботон хайгыыр ордук.
⁃ Талаанын сайыннарыаххын баҕарар буоллаххына, ол дьоҕуру кини баһылаабытын курдук санаа. Оччотугар оҕо эрэллээхтик сайдар. Түмүктээн эттэххэ, дьиэ кэргэҥҥэ төрөппүттэр оҕолорун өйдөһөргө-өйөһөргө үөрэттэхтэринэ, бэйэ икки ардыгар эйэлээх, ытыктабыллаах сыһыаны олохтоотохторуна, кырачаан майгыта, уйулҕата биллэ тупсар. Олоххо бэйэ суолтатын булууга, төрөппүт көмөтө олус наадалаах уонна туһалаах.